- సాయంత్రం అయ్యిందంటే చాలు.. దోమల దాడి ప్రారంభం. ఒక్క దోమ కుట్టినా చాలు.. కొన్నిసార్లు వ్యాధుల పాలయ్యే ఆస్కారముంది! అందుకే వీటి నుంచి రక్షణ పొందడానికి ఎక్కువ మంది దోమల చక్రాలు (మస్కిటో కాయిళ్లు), దోమల బిళ్లలు (మస్కిటో మ్యాట్లు) వినియోగిస్తున్నారు. ఎలక్ట్రానిక్‌ బ్యాటులు, శరీరానికి రాసుకునే కొన్ని రకాల క్రీములనీ చాలామందే ఉపయోగిస్తున్నారు. అయితే ఈ రక్షణ సాధనాల నుంచి గరిష్ఠ ప్రయోజనం పొంది.. దోమలు పరార్‌ అయ్యేలా చేయాలంటే వీటికి సంబంధించి కచ్చితమైన అవగాహన కలిగి ఉండటం అవసరం.
వీటిని పూర్తిగా అరికట్టడం, సంపూర్ణంగా నివారించడం మాటలు చెప్పినంత సులువేం కాదు. వీలైనంత వరకు దరిచేరకుండా చూసుకోవాలి. ఈ విషయంలో అశ్రద్ధగా వ్యవహరిస్తే, ఒంట్లోని రక్తాన్ని పీల్చేయడంతో పాటు భయంకరమైన వ్యాధులు వ్యాపించడానికి కారణం అవుతాయి. భూమిపై సుమారు 2,700 జాతుల దోమలున్నా అందులో హాని కలిగించేవి అనాఫిలెస్‌, క్యూలెక్స్‌ దోమలే. వీటి కారణంగా మలేరియా,ఫైలేరియా, ఎల్లోఫీవర్‌, డెంగ్యూ, ఎన్‌సఫైలిటిస్‌ వ్యాధులు వ్యాపిస్తాయి.
- పరిశుభ్రతతో నియంత్రణ...
* దోమల చక్రాలని సాధారణంగా పైరెత్రమ్‌ అనే పూవు నుంచి తీసిన తైలానికి, రసాయనాలు కలిపి తయారుచేస్తారు. చక్రాల్లా ఉండే కాయిళ్లని ఒక్కసారి వెలిగిస్తే మొత్తం పన్నెండు గంటల పాటు వెలుగుతాయి. వీటికి విద్యుత్‌ వాడకం అవసరం లేదు. తేలిగ్గా ఉపయోగించుకొనే అవకాశం ఉండటంతో పల్లెల్లో వీటి వాడకం ఎక్కువవుతోంది. అయితే వీటి నుంచి వచ్చే పొగ కారణంగా త్వరగా అలెర్జీలు వస్తుంటాయి. అందుకే ఇప్పుడు అందుబాటులోకి వస్తోన్న పొగరాని చక్రాల (నో స్మోక్‌ కాయిల్స్‌) గురించి తెలుసుకొని కొనుగోలు చేయాలి.
* వేపరైజింగ్‌ మ్యాట్లకి కూడా ఈ మధ్యకాలంలో ఆదరణ పెరిగింది. వీటిని సాధారణ విద్యుత్‌ సాకెట్‌లో ఉంచగానే, అది క్రమంగా వేడెక్కి దోమల కదలికలను నిర్వీర్యం చేసేలా పొగను విడుదల చేస్తాయి.
- కొనేముందు పరిశీలించాలివి...
* దోమలను పారదోలే ఉత్పత్తుల్లో ఏయే పదార్థాలు ఉపయోగించారో గమనించాలి. అందుకోసం వాడే అల్లాత్రిన్‌, పారాల్లాత్రిన్‌ ఏ మోతాదులో వినియోగించారో ప్యాక్‌పై చూడాలి. అది తయారయిన చిరునామా, లైసెన్సు నంబరు, కాలావధి (డేటాఫ్‌ ఎక్స్‌పైరీ), ఉపయోగించే తీరుని కూడా పరిశీలించాలి.
* కాయిల్‌ని కొనే ముందు అది ఎంత సేపు వెలుగుతోంది, ఎంత సమయం దోమల నుంచి పూర్తిగా రక్షణ కల్పిస్తోంది.. అని గమనించాలి. దోమల చక్రాలను విడదీస్తుంటే అవి సులభంగా ముక్కలు కాకుండా రెండుగా రావాలి. ఒక డబుల్‌ కాయిల్‌ బరువు 25గ్రాములు కంటే తక్కువగా ఉండకూడదు. అది ఎనిమిది గంటల పాటు వెలగాలి. అదే 30 గ్రాములు ఉంటే పది గంటలు పాటు, 36 గ్రాములుండే జంబో కాయిల్‌ అయితే పన్నెండు గంటల పాటు నిరాటంకంగా వెలగాలి. ఇదే సమయంలో అవి దోమలని ఎంత వేగంగా, సమర్థంగా పారదోలుతున్నాయి అనేదీ పరిగణనలోకి తీసుకోవాల్సిన అంశమే.
- ====================
No comments:
Post a Comment
Your comment is very important to improve the Web blog.